Планинскиот дел од Демир Хисар е во групата на средни и високи планини од 1000 до 2000 м.н.в. со највисок врв Плаќе од 1999 м.н.в. Во густите планински шуми има богат и разновиден див животински свет: мечка, дива свиња, дива мачка, срна, зајак, јазовец, куна, верверица, лисица, ласица, царева невестулка, и др. Ова подрачје имало и рисови но сега тие се вистинска реткост. Во овој крај забележани се над 25 видови птици. Сео тоа богатство на разновиден животински свет овозможува развој на ловниот туризам, за оние животни за кои ловот е дозволен во одредените временски сезони.

Бигла, Илинска и Вировска Планина изобилуваат со извори, потоци и реки. „На секој чекор има ивор или чешма“, нагласуваат мештаните. Исто така и реките (Црна и др.) и вештачките езера изобилуваат со неколку видови риби: мренка, крап, пастрмка, белвица, клен и др. а во поголемите реки има и видри, што пак овозможува на развој на риболовен туризам.

Во општината егзистира ловното друштво „Елен“.

На 14-ти март 2008 г., зад бензинската станица Маит, започна да се гради првиот приватен ловен резерват. Тоа ќе преставува ловен резерват за диви животни. Резерватот е заедничка Македонско - италијанска сопственост и ќе допринесе за развој на ловниот туризам во Демирхисарскиот регион.